ЭЛЧИН САЙД П.СЭРГЭЛЭН КУВЕЙТ УЛСЫН МЭДЭЭЛЭЛ, СОЁЛЫН САЙД БӨГӨӨД ЗАЛУУЧУУДЫН АСУУДАЛ ЭРХЭЛСЭН ТӨРИЙН САЙД АБДУЛРАХМАН БАДАХ АЛЬ-МУТАЙРИ-ТАЙ УУЛЗАВ
Элчин сайд П.Сэргэлэн 2025 оны 8 дугаар сарын 21-ний өдөр Кувейт Улсын Мэдээлэл, соёлын сайд бөгөөд Залуучуудын асуудал эрхэлсэн Төрийн сайд Абдулрахман Бадах Аль-Мутайри-тай уулзаж, хоёр улсын хэвлэл мэдээлэл, соёл, залуучуудын хамтын ажиллагааны талаар дэлгэрэнгүй санал солилцов.
Уулзалтын эхэнд Элчин сайд П.Сэргэлэн Монгол Улсын Соёл, спорт, аялал жуулчлал, залуучуудын сайд Ч.Ундрамын халуун дотно мэндчилгээг сайд Абдулрахман Бадах Аль-Мутайри-д уламжилж, Элчин сайдын яамны зүгээс хоёр улсын харилцаа, хамтын ажиллагааг улс төр, худалдаа, эдийн засаг, соёл, спорт, аялал жуулчлал, залуучуудын салбарт хөгжүүлэх чиглэлээр хийж, хэрэгжүүлж буй ажлуудын талаар болон цаашид хэрэгжүүлэхээр төлөвлөж буй ажлуудын талаар дэлгэрэнгүй танилцуулав.
Элчин сайд хоёр улсын харилцаа, хамтын ажиллагааг эдийн засгийн агуулгаар баяжуулах хүрээнд Булангийн орнуудын магадлан итгэмжлэлийн төвөөс Халал итгэмжлэл авч, Монгол Улсаас Кувейт Улс руу мах, махан бүтээгдэхүүний экспорт өнгөрсөн оны сүүлээр эхэлж, “Carrefour” сүлжэээ дэлгүүрүүдээр худалдаалж эхэлсэн бөгөөд Кувейт Улсын хэрэглэгчид Монгол махны амт, чанарт өндөр сэтгэгдэлтэй байгаа талаар болон цаашид махны экспортын хэмжээг ихэсгэж, бусад хөдөө аж ахуйн гаралтай бүтээгдэхүүний экспортыг эхлүүлэхээр холбогдох талууд төлөвлөн ажиллаж байгаа талаар мэдээлэв.
Түүнчлэн энэ онд Монгол, Кувейтийн хооронд дипломат харилцаа тогтоосны 50 жилийн ой тохиож буйтай холбогдуулан Монгол Улсаас Кувейт Улс руу дээд, өндөр түвшний айлчлал зохион байгуулах, Эль-Кувейт хотноо Монгол үндэсний соёл, урлагийн тоглолт, хүлээн авалт, бизнес форум, хоолны фестиваль, Монгол Улсын нэрэмжит морин уралдаан, уран зургийн үзэсгэлэн зэрэг цогц арга хэмжээнүүдийг шат дараатайгаар зохион байгуулахаар төлөвлөж, бэлтгэл ажлыг эхлүүлээд байгаа талаар мэдээлж, энэ чиглэлд хамтран ажиллах эрмэлзэлтэй байгаагаа илэрхийлэв.
Мөн хоёр талын харилцааг өргөжүүлэн хөгжүүлэхэд соёл, хэвлэл мэдээллийн салбарын хамтын ажиллагаа чухал үүрэг гүйцэтгэдэг болохыг тэмдэглээд манай хоёр улс соёл, өв уламжлал, амьдралын хэв маягийн хувьд нийтлэг, ижил төстэй зүйлс их байдаг тул 50 жилийн ойг тохиолдуулан Монгол Улсыг Кувейт Улсад, Кувейт Улсыг Монгол Улсад харилцан сурталчлан таниулах контент бүтээж, хоёр улсын хэвлэл мэдээлэл, үндэсний телевизийн сувгуудаар цацах чиглэлд хамтран ажиллах саналтай байгааг тэмдэглэв. Үүнээс гадна хоёр улсын соёл, спорт, залуучууд болон хэвлэл мэдээллийн салбарын хамтын ажиллагааг өргөжүүлэх, эрх зүйн орчныг сайжруулах хүрээнд Монгол Улсын Соёл, спорт, аялал жуулчлал, залуучуудын яам, Кувейт Улсын Мэдээлэл, соёлын яам хооронд, Монголын Үндэсний Олон Нийтийн Радио Телевиз (МҮОНРТ), Кувейтийн Үндэсний Телевиз (KTV) хоороонд болон Монцаме мэдээллийн агентлаг, Кувейтийн мэдээллийн агентлаг (KUNA) хооронд хамтран ажиллах зэрэг Санамж бичгүүдийг байгуулах эрмэлзэлтэй байгааг илэрхийллээ.
Мэдээлэл, соёлын сайд бөгөөд Залуучуудын асуудал эрхэлсэн Төрийн сайд Абдулрахман Бадах Аль-Мутайри нь хоёр улсын харилцаа, хамтын ажиллагаа сүүлийн жилүүдэд идэвхтэй хөгжиж байгаад сэтгэл хангалуун байгаагаа илэрхийлж, Элчин сайдын дэлхийд хамгийн олон морьд оролцсон уралдаан, мөн дэлхийд хамгийн олон хүн морь унаж орлцсон морьтой жагсаал зохион байгуулж, гиннесийн амжилт тогтоосон туршлагаас суралцах хүсэлтэй байгаагаа илэрхийлэхийн зэрэгцээ Кувейт Улс өөрсдийн биет бус өв болох “Диванияа”-г ЮНЕСКО-д бүртгүүлэх чиглэлээр ажиллаж байгаа талаар хуваалцав.
Мөн Кувейт Улсын Мэдээлэл, спорт, аялал жуулчлал, залуучуудын салбарыг хариуцан ажилладгийн хувьд хоёр улсын эдгээр салбарын хамтын ажиллагааг хөгжүүлэх эрх зүйн баримт бичгүүдийг байгуулахыг дэмжиж байгаагаа тэмдэглэхийн зэрэгцээ Элчин сайдын яамнаас санаачлан 50 жилийн ойг тохиолдуулан зохион байгуулахаар төлөвлөж буй соёлын болон бусад арга хэмжээнүүдийг амжилттай хэрэгжүүлэх хүрээнд хамтарсан ажлын хэсэг гаргаж, үйл ажиллагааны төлөвлөгөө, хуваарь боловсруулах, мөн Кувейт Улсын Соёл, урлаг, утга зохиолын Үндэсний зөвлөлтай хамтран зохион байгуулах хүрээнд тус зөвлөлийн Ерөнхий нарийн бичгийн даргатай уулзалт зохион байгуулах зэргээр бүхий л талын дэмжлэг үзүүлэхээ нотлов.