ЭЛЧИН САЙД П.СЭРГЭЛЭН КАТАР УЛСЫН ХОТ БАЙГУУЛАЛТЫН САЙД АБДУЛЛА БИН ХАМАД БИН АБДУЛЛА АЛЬ-АТТИЯА-ТАЙ УУЛЗАВ
Элчин сайд П.Сэргэлэн 2025 оны 3 дугаар сарын 26-ны өдөр Катар Улсын Хот байгуулалтын сайд Абдулла бин Хамад Абдулла Аль-Аттияа-тай уулзаж, хамтын ажиллагааны асуудлаар санал солилцлоо. Уулзалтын эхэнд Элчин сайд П.Сэргэлэн Монгол Улсын Хүнс, хөдөө аж ахуй, хөнгөн үйлдвэрийн сайд Ж.Энхбаяр болон Нийслэлийн засаг дарга бөгөөд Улаанбаатар хотын захирагч Х.Нямбаатар нарын халуун дотно мэндчилгээг уламжлахын зэрэгцээ Монгол Улсын Ерөнхийлөгч У.Хүрэлсүх 2022 онд Монгол Улсын эртний нийслэл Хархорум хотыг сэргээн босгох зарлиг гаргаж, бүтээн байгуулалтын ажлууд эхэлсэн талаар товч мэдээлж, цаашид Катар Улсад 2022 оны Дэлхийн хөлбөмбөгийн аварга шалгаруулах тэмцээний үеэр шинээр байгуулсан Лусайл хотын сайн туршлагаас суралцах хүсэлтэй байгаагаа илэрхийлэв. Мөн үеэр Монгол Улсын нийслэл Улаанбаатар, Катар Улсын нийслэл Доха хотын хооронд эгч дүүс хотын хэлэлцээр байгуулж, хамтын ажиллагааг эхлүүлэх хүсэлтэй байгааг тэмдэглэв.
Түүнчлэн харилцан төслийг солилцоод буй Монгол Улсын Хүнс, хөдөө аж ахуй, хөнгөн үйлдвэрийн яам, Катар Улсын Хөдөө аж ахуйн салбарыг давхар хариуцдаг Хот байгуулалтын яам хооронд Хөдөө аж ахуйн салбарт хамтран ажиллах тухай санамж бичиг болон мал эмнэлэг, хорио цээрийн салбарт хамтран ажиллах тухай Санамж бичгийг эцэслэн тохирох, мөн Монгол Улсаас Катар Улс руу мах, махан бүтээгдэхүүний экспортыг ойрын хугацаанд эхлүүлэхээр төлөвлөж буйтай холбогдуулан Хүнс, хөдөө аж ахуй, хөнгөн үйлдвэрийн сайдаар ахлуулсан холбогдох албан тушаалтнуудыг Катар Улсад айлчлуулах эрмэлзэлтэй байгааг илэрхийлэв.
Сайд Абдулла бин Хамад Абдулла Аль-Аттияа Хөдөө аж ахуйн салбарын төлөөллийн Катар Улсад хийх айлчлалыг хүлээн авахад бэлэн байгаагаа илэрхийлж, товыг дипломат шугамаар тохирохоо мэдэгдэв. Мөн Катар Улс шинэ, ухаалаг Лусайл хотыг бүтээн байгуулсан туршлагаас хуваалцах, энэ хүрээнд Хархорум хотын бүтээн байгуулалтын асуудал хариуцсан төлөөлөгчдийг Катар Улсад урьж, туршлага судлах ажлуудыг зохион байгуулах бүрэн боломжтойг тэмдэглэв. Түүнчлэн Улаанбаатар хот, Доха хотын хооронд эгч дүүс хотын хэлэлцээр байгуулж, хамтын ажиллагааг эхлүүлэхийг бүрэн дэмжиж байгаагаа илэрхийлж, ойрын хугацаанд хэлэлцээрийн төслийг хүргүүлэхээ нотлов.
Уулзалтын үр дүнд талууд Улаанбаатар, Доха хотын хооронд эгч дүүс хотын хэлэлцээр байгуулж, хамтын ажиллагааг эхлүүлэх, Монгол Улсаас Катар Улс руу махны экспорт эхэлж байгаатай холбогдуулан Хүнс, хөдөө аж ахуй, хөнгөн үйлдвэрийн сайдаар ахлуулсан төлөөлөгчдийг Катар Улсад айлчлуулах, Хархорум хотыг сэргээн босгох бүтээн байгуулалтын асуудал хариуцсан төлөөлөгчдийг Лусайл хотын туршлагаас судлуулах хүрээнд Катар Улсад айлчлуулах, харилцан солилцсон хамтын ажиллагааны Санамж бичгүүдийг ойрын хугацаанд эцэслэхээр тохиров.