ЭЛЧИН САЙД П.СЭРГЭЛЭН КАТАР УЛСЫН ГАДААД ХЭРГИЙН ТӨРИЙН САЙД МУХАММАД БИН АБДУЛАЗИЗ АЛЬ-ХУЛАЙФИ-ТАЙ УУЛЗАВ
Элчин сайд П.Сэргэлэн 2025 оны 3 дугаар сарын 26-ны өдөр Катар Улсын Гадаад хэргийн Төрийн сайд Мухаммад бин Абдулазиз Аль-Хулайфи-тай уулзаж, хоёр улсын харилцаа, хамтын ажиллагаа болон төлөвлөж буй айлчлалын тов, бэлтгэл ажлын талаар санал солилцов.
Уулзалтын эхэнд Элчин сайд П.Сэргэлэн Монгол Улсаас Катар Улсад хавсран суугаа Элчин сайдын яамны 2023 болон 2024 онд хоёр улсын харилцаа, хамтын ажиллагааг өргөжүүлэн хөгжүүлэх чиглэлээр хийж, гүйцэтгэсэн ажлуудын талаар танилцуулж, зурган тайланг гардуулахын зэрэгцээ хоёр улсын хамтын ажиллагааны дунд болон урт хугацаанд хийж, хэрэгжүүлэхээр төлөвлөж буй ажлууд, тэр дундаа хоёр улсын хооронд 2023 онд байгуулсан Агаарын хэлэлцээрийн хүрээнд шууд нислэг үйлдэж эхлэх, бүх төрлийн паспорт эзэмшигчдийг харилцан визийн шаардлагаас чөлөөлөх хэлэлцээрийг ойрын хугацаанд байгуулах, халал аргаар бэлтгэсэн Монгол махыг Катарын зах зээлд танилцуулах арга хэмжээг хамтран зохион байгуулах зэрэг асуудлаар санал солилцов.
Түүнчлэн Монгол Улсаас Катар Улсад хэрэгжүүлэхээр төлөвлөж буй өндөр, дээд түвшний айлчлалын товыг эцэслэн тохирох асуудлаар санал тавьж, бэлтгэл ажлыг бүрэн хангах, айлчлалыг баялаг агуулгатай, үр дүнтэй хэрэгжүүлэх хүрээнд Монгол үндэсний соёл, урлагийн тоглолт, хоёр улсын хамтарсан бизнес форум болон бусад улс төр болон эдийн засгийн ач холбогдолтой арга хэмжээ нарыг Доха хотноо зохион байгуулах, явцдаа буй хамтын ажиллагааны баримт бичгүүдийг эцэслэн тохироход нягт хамтран ажиллах эрмэлзэлтэй байгаагаа илэрхийлж, хамтын ажиллагааг харилцан ашигтай боломжит бүхий л салбарт хөгжүүлэхэд хичээл зүтгэл гарган ажиллахаа нотлов.
Төрийн сайд Мухаммад бин Абдулзазиз Аль-Хулайфи Монгол Улсаас дээд, өндөр түвшний айлчлал хүлээн авахад бэлэн байгаагаа илэрхийлж, айлчлалын бэлтгэл ажил хоёр талд сайтар хангагдсан байгааг сайшаан ойрын хугацаанд товын талаар тодорхой хариу өгөхөө нотлов. Мөн хоёр улсын харилцаа, хамтын ажиллагаа сүүлийн жилүүдэд бүхий л талаар бодитой, үр дүнтэй өргөжин хөгжиж байгаад сэтгэл хангалуун байгаагаа илэрхийлж, Элчин сайдын цаашдын ажилд бүхий л талын дэмжлэг үзүүлэн ажиллахаа мэдэгдэв.
Түүнчлэн Монгол Улс нь стратегийн хувьд чухал ач холбогдолтой орон болохыг тэмдэглээд Катар Улсын Худалдааны сайдаар ахлуулсан төлөөлөгчдийг Монгол Улсад айлчлуулж, харилцан ашигтай хамтын ажиллагааны боломжийг судлах, цаашлаад Катар Улсаас Монгол Улсад дээд түвшний айлчлал хэрэгжүүлэх боломжийг эрэлхийлэн ажиллахаа нотолж, мөн энэ оны 5 дугаар сард болох бүс нутгийн томоохон арга хэмжээ болох Доха Эдийн засгийн форумд Монгол Улсаас өндөр, дээд түвшинд төлөөлөгч оролцуулах хүсэлтэй байгаагаа тэмдэглэв.
Уулзалт үр дүнтэй болж, талууд ойрын хугацаанд Монгол Улсаас Катар Улсад хэрэгжүүлэх дээд, өндөр түвшний айлчлалын товыг тохирох, бэлтгэл ажлыг хангах хүрээнд харилцан солилцсон баримт бичгүүдийг эцэслэх, хамтын ажиллагааны боломжийг судлах техникийн багийг Монгол Улсад ажиллуулах, Доха Эдийн засгийн форумд дээд, өндөр түвшинд төлөөлөгч оролцуулах чиглэлээр ажиллахаар тохиров.