МОНГОЛ УЛСЫН ЗАСГИЙН ГАЗАР, КУВЕЙТ УЛСЫН ЗАСГИЙН ГАЗАР ХООРОНДЫН АГААРЫН ХАРИЛЦААНЫ ТУХАЙ ХЭЛЭЛЦЭЭРИЙГ БАЙГУУЛЖ, ШУУД НИСЛЭГ ҮЙЛДЭХ ЭРХ ЗҮЙН ОРЧИН БҮРДЛЭЭ
Энэ онд Монгол, Кувейтийн хооронд дипломат харилцаа тогтоосны 50 жилийн ой тохиож буйтай холбогдуулан “Агаарын харилцааны тухай Монгол Улсын Засгийн газар, Кувейт Улсын Засгийн газар хоорондын хэлэлцээр”-ийг 2025 оны 1 дүгээр сарын 19-ний өдөр байгуулж, Монгол, Кувейтийн хооронд шууд нислэг үйлдэх эрх зүйн орчин бүрдлээ.
“Агаарын харилцааны тухай Монгол Улсын Засгийн газар, Кувейт Улсын Засгийн газар хоорондын хэлэлцээр”-т Монгол Улсын Засгийн газрыг төлөөлж, Зам, тээврийн яамны Төрийн нарийн бичгийн дарга С.Батболд, Кувейт Улсын Засгийн газрыг төлөөлж, тус улсын Иргэний нисэхийн Ерөнхийлөгч Шейх Хумоуд Мубарак Аль-Жабер Аль-Сабах нар гарын үсэг зурав. Ёслолын арга хэмжээнд Монголын талаас Монгол Улсаас Кувейт Улсад суугаа Онц бөгөөд Бүрэн эрхт Элчин сайд П.Сэргэлэн, ЭСЯ-ны III НБД Ч.Батмэнд, атташе Б.Хүрэлбат, Кувейтийн талаас Иргэний нисэхийн Ерөнхий захирал Дуайж Халаф Алотайби, Агаарын тээврийн газрын дэд захирал Абдулла Аль-Ражхи, ГХЯ-ны Эрх зүйн газрын ажилтан Халид Аль-Мехяал нар оролцов.
Энэхүү хэлэлцээрийн хүрээнд хоёр улсын агаарын тээвэрлэгчид шууд болон коммерын хамтын ажиллагааны хүрээнд нислэг үйлдэх боломжийг бүрдүүлэх бөгөөд Монгол Улсын хувьд цаашид Булангийн орнууд төдийгүй Европын орнууд руу шинээр нээх нислэгийн завсрын цэг болгон ашиглах, мөн зорчигч урсгалыг нэмэгдүүлэх, аялал жуулчлалыг дэмжих, хоёр улсын хооронд худалдаа, эдийн засгийн эргэлтийг ихэсгэх, тэр дундаа Монгол Улсаас Кувейт Улс руу хийж буй махны экспортын логистикийн асуудлыг хөнгөвчлөх, экспортыг илүү тогтмол болгоход эдийн засгийн чухал ач холбогдолтой хэлэлцээр юм.
Хэлэлцээрт гарын үсэг зурах ёслолын арга хэмжээний дараа Төрийн нарийн бичгийн дарга С.Батболд Кувейт Улсын Иргэний нисэхийн Ерөнхийлөгч Шейх Хумоуд Мубарак Аль-Жабер Аль-Сабах нар албан ёсны хоёр талын уулзалт хийв.
Уулзалтын үеэр Төрийн нарийн бичгийн дарга С.Батболд Зам, тээврийн салбар эдийн засаг, худалдаа, аялал жуулчлал, соёл боловсрол зэрэг бүхий л салбарын хамтын ажиллагааг өргөжүүлэн хөгжүүлэх үндэс, суурь болж байдгийг тэмдэглэж, ойрын хугацаанд хоёр улсын хооронд шууд нислэг үйлдэж эхлэх сонирхолтой байгаагаа илэрхийллээ.
Түүнчлэн Элчин сайд П.Сэргэлэн бүх төрлийн паспорт эзэмшигчдийг харилцан визийн шаардлагаас чөлөөлөх тухай хоёр улсын Засгийн газар хоорондын хэлэлцээрийг байгуулах саналыг кувейтийн талд тавиад буйг мэдээлж, хэлэлцээрийг ойрын хугацаанд эцэслэхэд дэмжлэг үзүүлэхийг хүсэв. Мөн хоёр улсын хооронд дипломат харилцаа тогтоосны 50 жилийн ойг тохиолдуулан харилцан дээд, өндөр түвшинд айлчлал зохион байгуулж, энэ үеэр 10 гаруй баримт бичгүүдэд гарын үсэг зурахаар төлөвлөж буй бөгөөд Элчин сайдын хувьд хоёр улсын худалдаа, эдийн засгийн хамтын ажиллагааг шинэ түвшинд аваачих энэхүү хэлэлцээрийг эцэслэн байгуулж байгаадаа баяртай байгаагаа илэрхийлэхийн зэрэгцээ хэлэлцээрийг байгуулахад дэмжлэг үзүүлэн ажилласан Кувейт Улсын холбогдох байгууллага, мэргэжилтнүүдэд талархал илэрхийлэв.
Иргэний нисэхийн Ерөнхийлөгч Шейх Хумоуд Мубарак Аль-Жабер Аль-Сабах хоёр улсын хооронд шууд нислэг үйлдэж эхлэх асуудлыг дэмжиж байгаагаа илэрхийлж, Кувейт Эйрвэйс болон Аль-Жазийра агаарын тээврийн компанитай энэ асуудлаар шуурхай уулзалт хийж, ойрын хугацаанд боломжийг судалж, хариу мэдэгдэхээ нотлов. Мөн хоёр улсын бүх төрлийн паспорт эзэмшигчдийг харилцан визийн шаардлагаас чөлөөлөх тухай хоёр улсын Засгийн газар хоорондын хэлэлцээрийг байгуулах асуудлаар кувейтийн талын холбогдох байгууллагатай нягт холбоотой ажиллаж байгаагаа мэдэгдэв.
Тус Элчин сайдын яам суугаа Кувейт болон хавсран суугаа Катар Улстай шууд нислэг үйлдэх эрх зүйн орчныг бүрдүүлж, Агаарын харилцааны тухай хэлэлцээрүүдийг амжилттай байгууллаа.